Дваесет и пет (25)+ причини поради кои младите заминуваат
Воја Жанетиќ
- Затоа што таму каде што ќе одат постои недостиг од работна сила, особено онаа образованата, а зошто недостигот не би се надоместил од онаму каде што таа сила е реално вишок, и плус, така „за Џ“ се добива неколку стотини илјади евра образовна и до неколку милиони евра работна вредност.
- Затоа што светот е поделен во минимум четири категории на држави и секој разумен државјанин на светот, особено оној помладиот, гледа да биде сместен во – таман во тек е фудбалското првенство, па да го искористиме терминот – „повисок ранг на натпреварување“.
- Затоа што државите од кои се заминува не разбираат (или не сакаат; или баш им е гајле) дека одливот на мозоци и работна сила, всушност, претставува бесплатен извоз на капитал, чија вредност се зголемува со годините.
- Затоа што овде, каде што би можеле да останат, младите немаат гаранција дека ќе ги добијат оние „РСПП“ важни за засновање на постојан престој: работа, семејство, правичност и перспектива.
- Затоа што најчестата „област“ во која престојуваат младите – интернет – баш и нема меѓудржавни граници, па со самото тоа, баш им е гајле за истите.
- Затоа што новата генерација гласа со нозете: таму каде што не им се допаѓа државата, општеството или власта – си одат на друго место, каде што сето тоа е подобро.
- Затоа што властите од државите од кои се заминува никогаш немале потреба од гласачи кои нешто би менувале или биле заинтересирани за иднина која достигнува преку границите на еден мандат.
- Затоа што не се планираат внуци на територија каде што некои, во текот на само еден мандат, ги обезбедуваат и внуците.
- Затоа што државата е, во суштина, некој вид на услужна дејност, а младите луѓе ем сакаат подобра услуга, ем подобрите услуги секогаш се борат за своите нови корисници.
- Затоа што вистинските државни буџети се креираат врз основа на идејата за оданочување на (идните) перспективни и способни, а не за задолжување на (поранешните и сегашните) неспособни и непродуктивни.
- Затоа што работата е – пазар; а на тој пазар овој самозаљубен Регион нема најдобра понуда, туку напротив.
- Затоа што ова е свет на дигитални номади, а не на аналогни грамади.
- Затоа што се владее со гласовите на мнозинството, а мнозинството не се млади и мнозинството млади – да не се лажеме сега – во суштина и не ги интересира.
- Затоа што сѐ уште владее мантрата за тоа дека ние во опкружувањето сме земји со евтина работна сила, како да е цената на работата на населението нешто налик на доминантната боја на нивната кожа, па тоа не може никогаш да се промени.
- Затоа што слободата е, меѓу другото, онолку колку што можеш да се обезбедиш себеси финансиски, а младите баш некако сакаат – такви се, што да се прави – да живеат таму каде што има слобода.
- Затоа што на изборите победуваат ветувања за подобар живот, а не планови за подобра иднина.
- Затоа што на новата генерација никој од претходната генерација не им се извинил за светот што им е оставен.
- Затоа што и со авион може да се дојде на викенд, и преку Скајп да видиш како се твоите, а и полесно е да бидеш патриот од далечина.
- Затоа што миграциите постоеле откако постојат и сиромаштијата, и желбата, и волјата, и надежта – значи, отсекогаш.
- Затоа што ниту старите не би останале, само кога би биле помлади.
- Затоа што за условите за живот повеќе размислуваат оние што имаат повеќе живот.
- Затоа што кога си млад, не е „како е, така е“, „што можеш тука“ и „само нека сме живи и здрави“.
- Затоа што не можеш да ги потпомагаш родителите со просечни пензии со просечна плата од ова поднебје.
- Затоа што туѓото е послатко најмногу кога домашното е блуткаво.
- Затоа што овие „затоа што“ можат да бидат и 250, ама еве нека бидат овие 25, бидејќи дојде време овој текст да се заврши.
Leave A Comment